Ikasturteko lehen hilabeteetan hainbat proiektu egin dira mintegiak emandako irakasgaietan. Horietako batzuk zuekin partekatu nahiko genituzke:

1.DBH - Holograma

Proiektu honen helburua teknologiaren inguruko erakusketa bat egitea izan da. Horretarako, talde bakoitzari historiaren garai bat esleitu zitzaion. Ikasle bakoitzak orduko asmakizunen artean bat aukeratu behar zuen eta haren inguruko informazioa bildu. Ikasleek taldeka piramide bat eraiki zuten eta bertan proiektatuko zen animazioa ere sortu zuten.

Modu honetan, piramide guztiak jarraian kokatuta eta bakoitzean dagokion proiekzioa martxan jarrita eta kronologikoki ordenatuta teknologiaren asmakizunen denbora-lerro tridimentsional bat osatu genuen. Proiektu honen bitartez ikasleek teknologia zer den, zertarako balio duen eta historian zehar egindako ekarpenak aztertu ahal izan dute.

2.DBH - Etxebizitzen elektrifikazioa

Ikasturte hasieran adierazpen grafikoa Sketchup-ekin oinarrizko piezak 3Dn marraztuz landu ondoren, hurrengo proiektua etxebizitza bat Floorplanner erabiliz diseinatzea eta etxebizitza horren argiztapena planteatzea izan da.

Elektrizitatearen oinarrizko printzipioak landu ditugu (magnitudeak, Ohm-en legea, zirkuitu motak...), serieko eta paraleloko zirkuituen arteko desberdintasunak ulertzeko simulagailua erabili dugu, paperean eskema elektrikoak marraztu ditugu eta, azkenik, ikasitako guztia praktikara eraman dugu zirkuitua etxebizitzaren planoaren gainean sortuz.

4.DBH eta 1.Batx - 3D Sarri

DBHko 4. mailan mugikortasun jasangarriaren eta eraikin bioklimatikoen gaia landu dugu proiektuan. Sarriguren osoan eraiki berri den bidegorria nola geratu den aztertu dugu, baita herriko etxebizitzen efizientzia eta eraikin bateko zein elementuk lagundu dezaketen energia-kontsumoa murrizten.

Amaitzeko, ikasle bakoitzak 3 dimentsiotan marraztu du bere etxebizitza, eskalan. Eraikinak inprimatu eta aurrez inprimatutako 2x1 metroko plano batean itsatsi ditugu, bolumena emanez.
 

1. Bach-eko Informazioaren Teknologietako ikasleek ere badute 3D marrazketa atal bat kurrikulumean, eta beren etxebizitzak ere marraztu dituzte.

Dagoeneko marraztuta dauden eraikinak web orri honetan ikus daitezke. Proiektuak hazten jarraituko du hurrengo ikasturteetan, Sarriguren osoa inprimatuta egotea lortu arte.
 

2ºBach - Electrónica digital

USE-n galdetuko diguten Elektronika digitalaren praktikak egin ditugu. Gaia ikasteko aljebra logikoa landu dugu, nahiko abstraktoa da eta ulertzeko zaila, baina ariketak mekanikoki nola egin ikasi dugu. Praktikekin guzti hau errealitatera nola eraman ikusi dugu, eta paperean lortzen duguna benetan gertatzen da!!